उज्ज्वल थापालाई सम्झिदै देउवा भने, नेपाली राजनीतिमा ठूलो क्षति पुग्यो

काठमाडौं । नेपाली कांग्रेसका सभापति शेरबहादुर देउवाले विवेकशील साझा पार्टीका पूर्वसंयोजक तथा तत्कालीन विवेकशील नेपाली दलका संस्थापक अध्यक्ष उज्ज्वल थापाको निधनप्रति दुःख व्यक्त गरेका छन्। युवा राजनीतिकर्मी थापाको उपचारका क्रममा आज निधन भएको हो।

सभापति देउवाले मंगलबार शोक वक्तव्यमार्फत थापाप्रति श्रद्धाञ्जली अर्पण गर्दै आत्माको चिरशान्तिको कामनाका साथ पार्टी र आफ्ना व्यक्तिगत तर्फबाट शोकसन्तप्त परिवारजनमा समवेदना प्रकट गरेका छन्। उदीयमान युवा नेताका रुपमा आफूलाई स्थापित गर्न सफल थापाको निधनले नेपाली राजनीतिमा ठूलो क्षति पुगेको सभापति देउवाको भनाइ छ।

असल राजनीतिको आफ्नै मानक बनाएर गए उज्ज्वल

लाखौं कार्यकर्ता भएको कुनै ठूलो पार्टीका ‘वरिष्ठ’ नेता थिएनन् उज्ज्वल । मन्त्री त के सांसदसमेत बनेका थिएनन् कहिल्यै । चर्का-चर्का भाषण गर्ने र भिडको ताली खाने कला पनि थिएन उनमा ।

तर, उज्ज्वलसँग ती चिज थिए, जसको नेपालका आम राजनीतिकर्मीमा अभाव छ । राजनीतिक इमान्दारिता । इच्छाशक्ति । देश बदलिन्छ र बदल्नैपर्छ भन्ने हुटहुटी । सरल जीवनशैली आदि । उनी सही नियतले राजनीतिमा लागेका थिए । राजनीतिको भर्‍याङ चढेर उच्च ओहदामा पुग्ने अनि आफ्नो व्यक्तिगत जीवनस्तर उकास्ने चेष्टा उनको थिएन ।

उज्ज्वलले सुरुदेखि नै राजनीतिमा फरक अभ्यास गर्न खोजे । इमानपूर्ण राजनीतिको आफ्नै मानक बनाउन प्रयास गरे । युवाहरुलाई राजनीतिसँगै उद्यम पनि गर्नुपर्छ भनेर मार्गदर्शन गरे । राजनीतिलाई पेशा होइन, सेवाको रुपमा लिए ।

हामी यस्तो देशमा छौं, जहाँ राजनीति र नेताहरुप्रति जनतामा दिन प्रतिदिन वितृष्णा चुलिँदो छ । देश हाँक्ने ठाउँमा रहेका ठूला पार्टीका नेताहरु जनताको नजरबाट निरन्तर तल खसिरहेका छन् । कुनै नेताको निधन भयो भने पनि कार्यकर्ता पंतिबाट औपचारिकतावस आउने ‘आरआइपी’ बाहेक जनताको वास्तविक सहानुभूति छचल्किँदैन ।

तर, उज्ज्वल थापा कोरोना संक्रमणबाट गम्भिर विरामी भएको खबर बाहिरिएसँगै देशव्यापी चिन्ता र चासो देखियो । सामाजिक सञ्जालमा धेरैले उनको स्वास्थ्यलाभका कामना गरे । यो कामनालाई पनि औपचारिक मान्न सकिन्थ्यो । तर, जब उनको उपचार खर्चिलो हुने भएपछि आर्थिक सहयोगको आह्वान गरियो, त्यसबेला देखियो कि जनताले साँच्चै उनलाई बचाउन चाहेका छन् । एउटा नेताको उपचारका लागि २४ घन्टामा जनस्तरबाट ५० लाखभन्दा बढी रकम संकलन हुनु आश्चर्यजनक थियो ।

उज्ज्वलको स्वास्थ्यलाभका लागि प्रार्थना र आर्थिक सहयोग गर्नेमा उनको पार्टीका कार्यकर्ता र शुभेच्छुक मात्र थिएनन् । आमजनताको सद्भाव उनले पाएका थिए । नेताले जनताको माया पाउन कुनै विलक्षण क्षमता देखाउनुपर्दैन, देशका लागि बहुतै ठूलो योगदान पनि दिनुपर्दैन, केवल इमानको राजनीति गरिदिए पुग्छ भन्ने उदाहरण पनि हुन् उज्ज्वल ।

उज्ज्वल थापा पछिल्लो समय विवेकशील पार्टीको नेतृत्वमा थिएनन् । केही समयअघि पार्टीका युवा नेता मिलन पाण्डेलाई अध्यक्ष बनाएर आफू पर्दापछाडि बसेका थिए । उनले ४४ वर्षकै उमेरमा आफूलाई नेतृत्वबाट अलग गरे, जबकि उनलाई नेतृत्व छोड्न कुनै दवाव थिएन । पार्टीमा सहजतापूर्वक नेतृत्व हस्तान्तरण गरेर उज्ज्वलले आफूलाई फरकरुपमा उभ्याए ।

चुनावी राजनीतिमा भने उज्ज्वल सफल हुन सकेका थिएनन् । युवाहरुका बीचमा लोकप्रियता कमाएतापनि चुनाव जित्नका लागि बलियो पार्टी संगठन र कार्यकर्ताको ठूलो पंति उनीसँग थिएन । उनको पार्टीसँग प्रजातन्त्रका लागि ठूला लडाईं लडेको बिरासत वा जेलनेल भोगेका नेताहरुको पंति पनि थिएन । केवल उर्जाशील युवाहरु थिए, जोसँग देश बदल्ने आकांक्षा थियो ।

अघिल्लो संसदीय चुनावमा उज्ज्वल काठमाडौंको क्षेत्र नं. ५ बाट उम्मेदवार बनेका थिए । चुनावमा एमाले र कांग्रेसपछि तेस्रो स्थानमा आएका उनले ६ हजार ८ सय १३ मत ल्याए । हेविवेट उम्मेदवारहरुसँग भिडेको सानो पार्टीको उम्मेदारले यति भोट ल्याउनु उत्साहजनक नै थियो ।

उज्ज्वल राजनीतिमा अरुले बनाएको बाटोमा हिँडेका थिएनन् । उनले आफ्नो बाटो आफैं खनेका थिए । राजनीति कमाइ खाने भाँडो होइन र राजनीति गर्नेले आर्थिक उपार्जनका लागि उद्यम पनि गर्नुपर्छ भन्ने उनको मान्यता थियो । उनले ठूला-ठूला राजनीतिक एजेन्डाहरु अघि सारेर होइन, भ्रष्टाचारविरुद्ध निरन्तर आवाज बुलन्द गर्दै जनजिविकासँग जोडिएका स-साना मुद्दाहरुमार्फत जनताको मन जित्ने प्रयास गरे ।

को हुन् उज्ज्वल ?

काठमाडौं निवासी उज्ज्वल बुढानिलकण्ठ स्कुलबाट ‘ए लेभल’ सकेपछि छात्रवृत्ति पाएर अमेरिकामा आइटी पढ्न गए । पढाइ सकेर स्वदेश फर्किएपछि उनले नेपालमा आइटी कम्पनी दर्ता गरेर काम सुरु गरेका थिए । एक्लैले सुरु गरेको कम्पनीलाई उनले पछि केही दर्जन युवाहरुलाई रोजगारी दिनसक्ने बनाए ।

आफ्नो पेशाभन्दा माथि रहेर केही गर्नुपर्छ भन्ने हुटहुटी उनमा थियो । त्यसैले आइटी सेक्टरमै काम गर्ने केही साथीहरु भेला गरेर एउटा अनौपचारिक संगठन बनाए । विवेकशील नेपाली दलको बिउः त्यही आइटी उद्यमीहरुको संगठन थियो ।

देशको राजनीतिक वातावरण विग्रिँदै गएको थियो । त्यसले सबै क्षेत्रमा प्रभाव पारेको थियो । देशलाई ठिक दिशामा ल्याउन युवाहरु नै राजनीतमा होमिनुपर्छ भन्ने निस्कर्षसहित उज्ज्वललको समूहले पार्टी दर्ता गरेर चुनाव लड्ने निर्णय लियो ।

२०७० सालमा भएको दोस्रो संविधानसभाबाट उज्ज्जल राजनीतिमा होमिएका हुन् । कतै दर्ता नभएको ‘विवेकशील नेपाली मञ्च’ निर्माण गरेर व्यवसायीक काम गरिरहेका उज्ज्वल राजनीतिमा आउँदा उनीसँग कुनै अनुभव थिएन ।

दोस्रो संविधानसभा चुनावमा भाग लिने निर्णय गरे पनि त्यसबेला दल दर्ताका लागि १० हजारको हस्ताक्षर जुटाउन उनीहरुलाई धौ-धौ परेको थियो । फर्जी काम गरेको भए तत्काल हुन्थ्यो । तर असली हस्ताक्षर जुटाउन खोज्दा सम्भव भएन ।

अन्ततः उनको समूहले स्वतन्त्र उम्मेदवारहरु उठाएर एउटै चुनावचिन्हमा चुनाव लडेको थियो । साझा चुनाव चिन्ह छानिएको थियो कुकुर । यसबेला उज्ज्वल सहित चार युवाले कुकुर चुनावचिन्हबाट चुनाव लडेका थिए । चुनावचिन्हकै कारणले पनि उनीहरुप्रति जनचासो उत्पन्न भएको थियो । कतिले उनीहरुलाई खिसट्यूरी पनि गरे ।

काठमाडौं १, ४, ५ र ८ मा चुनाव लडेका स्वतन्त्र उम्मेदवारहरुले उल्लेख्य भोट ल्याउन सकेनन् । सबैभन्दा बढी थापाले एक हजार एक सय ६३ भोट ल्याएका थिए ।

२०७४ सालमा भएको स्थानीय चुनावपछि विवेकशील नेपाली दलको चर्चा चुलिएको थियो । उक्त चुनावमा रञ्जु दर्शनाले काठमाडौंको मेयरमा ठूला दलहरुलाई टक्कर दिएकी थिइन् । त्यसपछि भएको चुनावअघि विवेकशील र साझा पार्टीबीच एकता भयो । त्यसमा रवीन्द्र मिश्र र उज्ज्वल संयुक्त अध्यक्ष बनेका थिए ।

एक वर्षपछि पार्टीमा फुट आयो र पुरानो विवेकशील ब्यूँतियो । त्यसको केही समयमा उज्ज्वलले पार्टीको बागडोर मिलन पाण्डेलाई सुम्पिए । अहिले फेरि दोस्रोपटक विवेकशील र साझा पार्टीबीच एकीकरण भएको छ । एकीकृत पार्टीमा पनि उज्ज्वल नेतृत्वमा बसेका थिएनन् ।

उज्ज्वलले स्थापना गरेको विवेकशील नेपाली दल सुरुदेखि नै नेता-कार्यकर्ता र सुभेच्छुकहरुको आर्थिक सहयोगबाट चलेको थियो । आर्थिक पारदर्शीमा भएकाले यस दललाई देश विदेशबाट आर्थिक सहयोग हुँदै आयो । नेपाल बन्दको विरोधमा चलाएका अभियान, भ्रष्टाचारविरोधि आन्दोलन, भूकम्पपछिको उद्दार र राहतमा सक्रियता, आर्थिक पारदर्शीता तथा अन्य लोकप्रिय एजेन्डाहरुको बलमा विवेकशीलले युवाहरुमा आकर्षण पैदा गर्न सफल भएको थियो ।

भर्खरै प्रकाशित

भारतमा साधु ‘बाबा’ को अवतारमा पूर्वप्रधानन्यायाधीश दामोदर शर्मा !

काठमाडौं । यो तस्बिर कस्को होला ? झट्ट हेर्दा यो तस्बिर पशुपतिको कुनै सन्यासी/जोगीको जस्तो लाग्छ । तर, होइन यो फोटो अहिले सामाजिक सञ्जालमा भाइरल…

मेलम्ची : जब पाँच गोदाम खाद्यान्नका मालिक भोकै भए…

मेलम्ची । मेलम्ची बजारको उत्तरी छेउमा अवस्थित एक खाद्यान्न पसलको भुइँमा बीस प्याकेट तोरीको तेल सुकाइएको छ । छेउमा ६१ वर्षीय ज्ञानेन्द्र श्रेष्ठ झोक्राएर बसिरहेका…

अदालतले दियो ओली सरकारलाई अर्को झट्का : चुरेको गिट्टी, बालुवा…

चुरे क्षेत्रको ढुंगा, गिट्टी र बालुवा बेच्ने निर्णय तत्काल कार्यान्वयन नगर्न सर्वोच्च अदालतले अन्तरिम आदेश गरेको छ । सो रिटबारे सुनुवाइपछि संवैधानिक इजलासले अन्तरिम आदेश…

गंगामा तैरिरहेको बाकसभित्र भेटिइन् २१ दिनकी बच्ची, बाहिर निकाल्ने आँट…

भारतीय राज्य उत्तर प्रदेशको गाजिपुरस्थित ददरीघाटमा गत सोमबार बिहान गंगा नदीमा एउटा प्लाइउडको बाकस बग्दै-बग्दै आइरहेको थियो। सोमबार गंगामा स्नान गर्न गएकाहरूले बाकसबाट बच्चा रोइरहेको…

मल्टिपल इन्ट्री भिसा भएका नेपालीहरु खोप लगाउनकै लागि अमेरिका जान…

काठमाडौं । मल्टिपल इन्ट्री भिसा भएका नेपालीहरु खोप लगाउनकै लागि अमेरिका जान थालेका छन् । अमेरिकाले विदेशी पर्यटकका लागि पनि सजिलै कोरोनाविरुद्धको खोप दिन थालेपछि…