आईसीयूबाट डाक्टरको अपिल- बाँच्न गाह्रो छ, सेल्फ लकडाउनमा बस्नुस्

आईसीयू वार्ड । टिकटिक आवाज….. !

मुटुको चाल कहिले ८० मा दौडन्छ, कहिले ५० मा झर्छ । ‘सास फेर्न गाह्रो भयो’, आईसीयू बेडबाट मलिन आवाज आउँछ । नर्स हतारिँदै अक्सिजनको लेभल हेर्छिन् । अनि घोप्टो पर्न सुझाउँछिन् ।

शुक्रराज ट्रपिकल तथा सरुवा रोग अस्पताल टेकुको आईसीयू र भेन्टिलेटरमा रहेका बिरामी न आफैँ शौचालय जान सक्छन्, न खाना खान सक्छन् । मास्क लगाउने त परको कुरा, चिकित्सकले एक सेकेन्ड पनि छोड्न मिल्दैन ।

आईसीयू वार्ड । टिकटिक आवाज….. !

मुटुको चाल कहिले ८० मा दौडन्छ, कहिले ५० मा झर्छ । ‘सास फेर्न गाह्रो भयो’, आईसीयू बेडबाट मलिन आवाज आउँछ । नर्स हतारिँदै अक्सिजनको लेभल हेर्छिन् । अनि घोप्टो पर्न सुझाउँछिन् ।

शुक्रराज ट्रपिकल तथा सरुवा रोग अस्पताल टेकुको आईसीयू र भेन्टिलेटरमा रहेका बिरामी न आफैँ शौचालय जान सक्छन्, न खाना खान सक्छन् । मास्क लगाउने त परको कुरा, चिकित्सकले एक सेकेन्ड पनि छोड्न मिल्दैन ।

टेकु अस्पतालको आईसीयूमा भर्ना भएका बिरामी ।

‘आज धेरै ‘स्ट्रेस’ भयो । भित्र छिर्दा कसैको सुधार भएको देखिँदैन । आईसीयू भेन्टिलेटरमा रहेका सबै सिकिस्त छन्’, बिरामीको अवस्थाबारे एक नर्स अस्पतालका प्रमुख कन्सल्टेन्ट डा. अनुप बाँस्तोलालाई सुनाउँछिन् ।

अस्पतालमा कस्तो स्थिति छ डा. अनुप र नर्सको मुहारले प्रस्ट पार्छ ।

‘बाहिर हिँड्दा केही नदेखिए पनि अस्पतालमा आगो बलेको छ । भित्र बसेर लड्ने बिरामीको कथा फरक छ । धेरै गाह्रो छ’, डा. अनुप भन्छन्, ‘असहज परिस्थिति आएको छ । भित्र छिरेपछि बचाउन सकिएला त भन्ने चिन्ता लाग्छ । बिरामी आफैँ खान नसक्ने सिरियस छन् ।’

तर, कोरोनाबाट जोगिन कोही पनि सिरियस नभएकोमा उनी चिन्तित छन् । ‘अहिले मेकअप नगरे, लुगा नकिने, फिल्म हेर्न हलमा नगए हुन्न’, उनी भन्छन्, ‘यो संक्रमणबाट जोगिने समय हो । २५ जनाभन्दा बढी भेला नहुन भनिएको छ । सरकारको निर्णय कार्यान्वयन हुँदैन । अनुशासनमा कोही पनि बसेको छैन ।’

अस्पतालमा एकै परिवारका चार जनासम्म भर्ना भएका छन् । ‘आमा, छोरो, बुहारी तल वार्डमा छन् । बुबा माथि आईसीयूमा । कुरुवासमेत संक्रमित छन्’, डा. अनुप भन्छन्, ‘पहिले एक जना संक्रमित हुँदा आइसोलसनमा राखेर अरुलाई जोगाएका थियौँ । यो पटक त्यस्तो छैन । जोगाउन गाह्रो छ ।’

‘आईसीयू चाहियो । भेन्टिलेटर चाहियो । अक्सिजन चाहियो’, डा. अनुपको मोबाइलमा बारबार घण्टी बज्छ ।

‘सबै भरिएको छ । आईसीयू र भेन्टिलेटर छैन । अक्सिजनसम्म मिलाउन सक्छु’, उनी फोनबाट जवाफ फर्काउँछन् ।

‘मेरै घरको सदस्य र म आफैँ संक्रमित भएँ भने पनि आईसीयू, बेड, भेन्टिलेटर छैन । स्टाफका लागि छैन । बेडमा भएकालाई उठाएर अरु राख्ने स्थिति छैन’, उनी भन्छन्, ‘भेन्टिलेटर र आईसीयूका लागि मात्र दिनको १ सयभन्दा बढी फोन आउँछ ।’

काठमाडौंमा व्यापक संक्रमण फैलिएको उनको दाबी छ । ‘तराईबाट राजधानी आएकाहरूबाट जसलाई सर्‍यो, ती सिकिस्त छन्’, उनी भन्छन्, ‘तराईमा आगो बल्यो । काठमाडौं भुसको बममा छ । अब विस्फोट हुन्छ ।’

‘विस्फोट हुन नदिन के गर्ने त ?’

लक्षण भएकालाई नलुक्न उनी सुझाउँछन् । ‘लक्षण भएका परीक्षणको दायरामा आउनुहोस् । युवा छु भनेर सोच्ने अवस्था छैन । युवा नै सिकिस्त भएका छन् । वृद्धवृद्धाको कुरै भएन । स्थिति असामान्य छ । लक्षण देखिएका मान्छे लुकेर नबसौँ’, उनी भन्छन् ।

‘अनि ?’

सेल्फ लकडाउन, सेल्फ लकडाउन, सेल्फ लकडाउन……!

‘जनता थुनिएर बस्नुपर्छ । सरकारले लकडाउन गरेपछि बसौँलाभन्दा धेरै ढिला हुन्छ । यहाँ बेडमा भएका पनि सिकिस्त छन् । प्लिज ! अब बाँच्नुको अर्को विकल्प छैन । तीन/चार हप्ता घरबाट बाहिर ननिस्कनुस्’, उनको निष्कर्ष छ सेल्फ लकडाउन ।

मजदुरका लागि राहतको व्यवस्था मिलाएर सबैलाई घर-घरमा नराखे कोरोनाका कारण अकालमा धेरैले ज्यान गुमाउनुपर्ने खतरा औल्याउँछन् डा. अनुप ।

लकडाउन गर्दा सबैभन्दा धेरै दिउँसो काम गरेर बिहान बेलुका छाक टार्ने मजदुर मर्कामा पर्छन् ।

उनीहरूका लागि के गर्ने त ?

‘जसलाई खान पुग्छ, उसले केही हप्ताका लागि जोहो गर्नुपर्छ । मजदुरका लागि सरकार र संघसंस्थाले यो समय राहत दिनुपर्छ’, उनी भन्छन्, ‘अब जनतालाई कसरी जोगाउने भन्ने प्रश्न हो । नत्र अकालमा कोरोनाले धेरैको ज्यान जान सक्छ ।’

अत्यावश्यकबाहेक अरु सेवा रोकेर सबै अस्पताल कोभिडका बिरामीको उपचारमा खटिनुको विकल्प देख्दैनन् उनी ।

‘अत्यावश्यकबाहेक ननकोभिडको सेवा रोक्नुपर्छ । अस्पतालका बेडहरू कोभिडका लागि व्यवस्थापन गर्नुपर्छ’, उनी भन्छन्, ‘धेरै बिरामी भएपछि केयर कसरी गर्ने ? गुणस्तरीय सेवा दिन सक्छौँ त भन्ने चिन्ता छ ।’

अस्पताललगायत सबै क्षेत्रमा कर्मचारीको व्यवस्थापन गर्नुपर्नेमा उनको जोड छ । ‘आवश्यक कर्मचारी काममा आएर अरुलाई बिदा दिनुपर्छ’, उनी भन्छन्, ‘सरकारी कार्यालयदेखि बैंक, संघसंस्था सबैमा कर्मचारीको व्यवस्थापन गर्नु आवश्यक छ । भीडले नै हो आगो बाल्ने ।’

अस्पतालका निर्देशक डा. सागर राजभण्डारीको मत पनि उस्तै छ । उनी पनि लकडाउनको विकल्प देख्दैनन् । ‘१४ महिना करायौँ । दूरी कायम भएन । मास्क लगाएनन् । भीड उस्तै छ । खोप लगाउन भनेका छौँ’, उनी भन्छन्, ‘कम्तीमा दुई हप्ता लकडाउन गरौँ । जो जहाँ छ, त्यहीँ बसाउनुपर्छ । कन्ट्याक्ट ट्रेसिङ, परीक्षण गर्दै संक्रमितलाई आइसोलेसनमा राख्नुपर्छ ।’

अब सडकमै राखेर उपचार गर्नुपर्ने दिन आएको निर्देशक डा. राजभण्डारी बताउँछन् । ‘अक्सिजन र औषधिले धान्ने स्थिति छैन । एक हप्ताभित्र सडकबाट उपचार सेवा सुरु हुन्छ । जसलाई अक्सिजन चाहिन्छ । बाहिरबाटै अक्सिजन दिँदै पठाउँदै गर्नुको विकल्प छैन’, उनी भन्छन्, ‘हेल्चेक्य्राइँ धेरै भयो । कन्ट्रोल गर्नै सकिएन । नयाँ भेरियन्ट छिटो फैलिएको छ । हामी आत्तिएका छौँ ।’

डा. राजभण्डारी बिरामीलई अक्सिजन दिन स्वयंसेवक राख्नुपर्ने स्थिति आएको बताउँछन् । ‘कर्मचारी पुग्दैनन् । बिरामीको अक्सिजन छुट्यो भने सकियो । अक्सिजन दिन स्वयंसेवक राख्नुपर्ने भएको छ’, उनी भन्छन् ।

संक्रमण प्रत्येक दिन दुई गुणाले बढ्दै गएको तथ्यांक देखाउँछन् निर्देशक डा. राजभण्डारी । उनले देखाएको पाँच हप्ताको तथ्यांकले भन्छ, ‘कोरोना संक्रमणबाट आफैँ जोगिनुको अर्को विकल्प छैन ।’ साभार : शिलापत्र 

भर्खरै प्रकाशित

कुवेतले खोप लगाएका​लाई अगस्ट १ गतेदेखि प्रवेश अनुमति दिने

कुवेतले अनुमति दिएको कोरोना विरुद्धको दुवै डोज खोप लगाएका विदेशी नागरिकलाई आउँदो अगस्ट १ गतेदेखि प्रवेश अनुमति दिने भएको छ । कुवेतले फाइजर, बायोएनटेक, मोर्डेना,…

मन्त्रालय र मन्त्रीनिवास छाड्दै मन्त्रीहरू

काठमाडौं । मन्त्रिपरिषद् विस्तारको निर्णयलाई सर्वोच्च अदालतले अवैधानिक भएको ठहर गरेपछि २० मन्त्रालय मन्त्रीविहीन भएका छन् । सर्वोच्चको आदेशपछि पदमुक्त भएका मन्त्रीहरू मन्त्रालय गएका छैनन्…

बाढी पहिरोका कारण मेलम्ची खानेपानी आयोजनामा एक अर्ब बढीको क्षति

काठमाण्डाै । गएकाे हप्ताकाे निरन्तर वर्षापछि गएको पहिराले मेलम्ची खानेपानी आयोजनामा एक अर्ब रुपैयाँभन्दा बढीको क्षति भएको छ । आयोजनाका मुख्य संरचना सुरुङ र ‘हेडवर्क’…

छुवाछुत आरोपी घरबेटीलाई शिक्षामन्त्री कृष्णगोपाल श्रेष्ठले आफै छुटाए, आफ्नै गाडीमा…

काठमाडौँ। शिक्षा, विज्ञान तथा प्रविधि मन्त्री कृष्णगोपाल श्रेष्ठले छुवाछुत आरोपी स्वती प्रधानलाईलाइ महानगरीय प्रहरी वृत्त सिंहदरबारमै गएर रिहाइ गराएका छन्। घर भाडामा नदिएकै कारण गिरफ्तार…

प्रकृतिलाई हामीले सम्मान नगरेसम्म प्रकृतिले पनि सम्मान गर्दैन : राजेश…

काठमाडौं । देशका विभिन्न जिल्ला बाढी र पहिरोबाट प्रभावित भएको छ। सिन्धुपाल्चोक र मनाङ जिल्ला यसबाट सबैभन्दा धेरै प्रभावित बनेका छन्। बाढी र पहिरोले घरहरु…