प्रचण्ड-माधवविरुद्ध काउण्टर आन्दोलन : काठमाडौँमा भोलि तीन लाख मानिस उतार्ने

काठमाडौं । संसद् विघटनको मुद्दा सर्वोच्च अदालतमा विचाराधीन रहे पनि सत्तारुढ नेकपा ओली समूहले मध्यावधि चुनाव तोकिएकै मितिमा हुने उद्घोषसहित देशभर प्रदर्शनहरु गरिरहेको छ । राजधानी बाहिर विभिन्न जिल्लामा सभा गरिसकेको यो समूहले राजधानी उपत्यकामा शुक्रबार सभा राखेको छ ।

गत माघ ९ मा नेकपा प्रचण्ड-माधव समूहले बृहत सभा गरेपछि त्यसको काउण्टरमा हुन लागेको सभामा दुई देखि तीन लाख मानिस सहभागी हुने सो समूहका नेताहरुको दाबी छ ।

नारायणहिटी दरबार संग्रहालयमा अगाडि हुने सभामा मार्फत् मूलतः तीन सन्देश दिइने यो समूहका नेता महेश बस्नेत बताउँछन् । उनी भन्छन्, ‘विभाजित नेकपामा ग्राउण्ड तहका ९० प्रतिशत जनता केपी ओलीसँग छन् । जनता ताजा जनादेशको पक्षमा छन् । र, केपी ओलीको विकल्पमा प्रचण्ड वा माधव नेपालमात्र होइन, कांग्रेस पनि होइन भन्ने सन्देश दिने उद्देश्य हो ।’

प्रस्तुत छ,सभाको तयारीबारे बस्नेतसँग गरिएको कुराकानीको सम्पादित अंश :

भोलिको सभा कसरी हुन्छ, के छ प्रबन्ध ?

भोलि १६ स्थानबाट जुलुस निकाल्ने तयारी गरेका छौं । अनि, सबै जुलुस दरबारको मुख्य सडकमा मुख्यसभाका दर्शकहरु बस्छन् । केशरमहलदेखि जयनेपाल हलसम्म पनि बस्ने व्यवस्था छ । टी आकारमा भएको सबै सडक हामी कभर गर्छौ । लगभग यो सबै गरेर दुई लाख मानिस अट्छन् भन्ने हाम्रो अनुमान छ । तर, हाम्रो टार्गेट चाहिँ तीन लाख मानिस सहभागी गराउने हो । भोलि धेरै भव्य ढंगले सभा गर्ने तयारी अन्तिम चरणमा पुगेको छ ।

माघ ९ मा प्रचण्ड-माधव समूहले गरेको सभापछि प्रधानमन्त्रीले ‘सभा कस्तो हुन्छ भन्ने २३ गते हेर्नुहोस्’ भनेर चुनौती दिनुभएको छ । त्यसका लागि मान्छे चाँहि कहाँबाट कसरी आउँछन् ?

बागमती प्रदेशका जिल्लाहरुबाट प्रतिनिधिमुलुक सहभागिता र खासगरी उपत्यकाभित्रैबाट ब्यापक सहभागिता गराउने योजना हो । त्यसो हुँदाहुँदै पनि कतिपय जिल्लाहरुबाट ऐक्यवद्धता जनाउन उपत्यका बाहिरका कमरेडहरु पनि आउने योजना थियो । तर, विभाजित नेकपाका अर्को समूहको आजको आम हडतालले चाहिँ प्रभावित भएको छ । त्यही भएर १३ जिल्लाभन्दा बाहिरका मान्छे आउने अपेक्षा राखेका छैनौं । काठमाडौं उपत्यका र बागमतीका जिल्लाहरुबाट मात्रै फोकस गरेका छौं ।

अर्को समूहले अस्ति माघ ९ मा सभा गर्दा बाहिरी जिल्लाका आन्तरिक पर्यटक धेरै ल्याइयो भनेर आरोप लगाएको पनि सुनियो । अनि, तपाईहरुले उपत्यका बाहिरबाट ल्याइएको मान्छेलाई चाहिँ के भन्ने ?

हामीले त आयोजक नै बागमती प्रदेश भनेका कारणले वागमती प्रदेशभित्रका साथीहरु आउनुहुन्छ । जस्तो- अन्य जिल्लाबाट आएका छन् भने पनि त्यो ऐक्यवद्धता जनाउन स्वतःस्फूर्त खुशियालीमा साना गाडीहरु र केही मोटरसाइकलबाट हुने उपस्थिति मात्रै हो । हाम्रो फोकस फेरि पनि उपत्यका र वरपरका जिल्ला मात्रै हो ।

भनेको, आयोजकको आहृवान उपत्यका र बागमती बाहेकका कार्यकर्तालाई होइन ?

स्वतःस्फूर्त ऐक्यवद्धता जनाउनलाई आउनुहुन्छ ।

प्रधानमन्त्रीले नै जोड दिएर बृहत सभा भन्नु भएपछि यसको उद्देश्यचाहिँ के हो ?

यो सभाको उद्देश्य भनेको प्रधानमन्त्री केपी ओलीले चाल्नुभएको पछिल्लो कदमलाई जनमत, जनसमर्थन छैन भन्नेजस्तो प्रचार गरियो । हामीबाट विभाजित भएको शक्तिले दुई तिहाई हामीसँग छ, केपी ओलीसँग एकतिहाइ पनि पुग्दैन भन्ने ढंगले जुन प्रचार गर्‍यो, वास्तवमा त्यस्तो होइन । साविक नेकपाको ९० प्रतिशत ग्राउण्ड चाहिँ हाम्रो पक्षमा छ भन्ने सन्देश दिन यो सभा गरिन लागेको हो ।

दोस्रो, वैशाख १७ र २७ मा घोषित निर्वाचनको माहोल बनाउन आम जनता निर्वाचनको पक्षमा लागे भन्ने सन्देश दिने हो । र तेस्रो, नेपाली जनताले सामाजिक सदभावको पक्षमा, सामाजिक न्यायको पक्षमा, राष्ट्रियताको पक्षमा, सुखसमृद्धिको पक्षमा, सुखी नेपाल र समृद्ध नेपालको पक्षमा प्रधानमन्त्रीले अगाडि बढाउनुभएको योजनालाई साथ दिएका छन्, अनि केपी ओलीको विकल्पमा प्रचण्ड वा माधव नेपाल मात्रै होइन, कांग्रेस पनि होइन भन्ने सन्देश दिने उद्देश्य हो ।

तर, सरकार चलाइरहेको शक्तिले यस्तो प्रकृतिको सभा गर्नु उचित होइन भन्ने पनि टिप्पणी छ । तपाईले भनेका कुरा पुष्टि गर्न सभाकै खाँचो हो ?

हामीले अभ्यासमा लोकतन्त्र भनेको बहुदलीय व्यवस्था हो । बहुदलीय व्यवस्था भनेको चाहिँ जनताले आफ्नो मत दलहरुलाई दिएर सार्वभौम सत्ताको उपभोग गर्छन् । त्यसो हुँदा सत्तामा रहेका अथवा प्रतिपक्षमा रहेका दुवै दलहरुले निर्वाचनमा भाग लिन्छन् । र, निर्वाचनको माध्यमबाट प्रतिश्पर्धी दललाई हराउँछन् अथवा चुनौती दिन्छन् । त्यसो भएको हुनाले मुलुक निर्वाचनमा गइसकेपछि सम्बन्धित दल सत्तामा भए पनि, नभए पनि जनताको बीचमा जानुपर्छ र निर्वाचनमा सामेल हुनुपर्छ ।

यो सरकारद्वारा आयोजित सभा होइन । योचाहिँ नेपाल कम्युनिष्ट पार्टी -नेकपा) द्वारा आयोजित सभा हो । नेकपा सत्तामा भएका कारणले जुलुस नगर्ने, सभा नगर्ने, कार्यक्रम नगर्ने, जनतामा नजाने र स्वतःस्फूर्त निर्वाचन अर्को पक्षलाई आत्मसमर्पण गर्नु भनेजस्तो कुरा हुन्छ । त्योचाहिँ हामीले बहुदलीय व्यवस्था अवलम्वन गरेको कुरालाई नबुझेको साथीहरुले भनेको कुरा हो । हामी निर्वाचन प्रक्रियामा सशक्त ढंगले जाँदैछौं भन्ने सन्देश हो ।

प्रचण्ड-माधव समूहले गरेको आम हड्तालको जसरी विरोध जनाइएको छ । तर, तपाईहरु तीन लाख मान्छे उतार्ने भनेर उपत्यका अस्तव्यस्त पार्ने योजनामा हुनुहुन्छ । सत्तारुढ शक्तिको चाहिँ यसमा कुनै दायित्व हुन्न ?

बन्द हड्ताल र भोलिको हाम्रो कार्यक्रम फरक कुरा हो । बन्द हड्तालले ब्यापार, व्यावसाय, उद्योग, कलकारखाना सबै बन्द गर्ने र मुलुकमा खरबौंको क्षति हुने स्थिति हो । भोलिको आमसभाले क्षणिक यातायातको आवागमन मात्रै प्रभावित गर्छ । दरबारमार्ग छान्नुका पछाडि पनि केशरमहलदेखि जमलसम्मको रुट खोल्न सकिने र जयनेपाल हलदेखि कमलादी-पुतलीसडकको रुट खोल्न सकिन्छ । यता, रत्नपार्कको राउण्डको एरिया पनि प्रभावित हुँदैन । त्यसैले सभास्थलले यातायात प्रभावित नहोस् भनेर बडो सचेत छौं र एकदम कममात्रै दुःख दिन्छौं हामी ।

तैपनि तपाइँहरुले दाबी गर्नुभएको मानिसको उपस्थिति सानो होइन । यसले सभास्थल मात्रै प्रभावित हुन्छ भन्ने त हुँदैन होला ?

डेढ/दुई घण्टा काठमाडौंको यातायात अवरोध हुन्छ । त्यसका लागि हामी क्षमा याचित हुँदै कम जनतालाई दुख दिने हिसाबले कार्यक्रम गर्छौं ।

सभा जहाँ राख्नुभएको छ, नारायणहिटी अगाडि । त्यो पूर्वराजदरबार पनि हो । यसबारे आशंका पनि गरिएको छ । कुनै सन्देश दिनलाई हो ?

नारायणहिटीतिर हिजो औंला ठड्याएर बोलेर १४ वर्ष केपी ओली र हामी सबैले धेरथोर सिंगो पंक्तिले भोलि कार्यक्रम गर्दैछौं । अब सुरेन्द्र पाण्डे कमरेडले हाम्रो कार्यक्रमको सफलता देखेर यस्तो आरोप लगाउनुभएको छ । तर, हामीले काठमाडौं सबभन्दा कम जनतालाई अवरोध गरेर धेरै मान्छे अटाउने स्थान देखेर त्यहाँ कार्यक्रम राखिएको हो ।

भृकुटीमण्डपमा उहाँहरुले राखेको स्थानचाहिँ हाम्रो लागि धेरै सानो हुन्थ्यो । त्यस कारणले रोजेका हौं । त्यसलाई प्रतिकात्मक ढंगले बुझ्ने हो भने राजतन्त्र र सामन्तवादको अवषेश समाप्त पार्ने उद्घोषका रुपमा बुझ्दा पनि भयो । पूर्ण पुँजीवाद, समाजवाद र अहिले प्रधानमन्त्रीले परिपूरक लोकतन्त्रको कुरा गर्नुभएको छ, त्यसलाई समर्थन गर्न गरेको रुपमा बुझ्दा पनि भयो ।

तर, कृष्णगोपाल श्रेष्ठले माघ २३ गतेको सभामा प्रधानमन्त्रीले अहिलेसम्म भन्दै नभनेको र सुन्दै नसुनेको कुरा भन्दै हुनुहुन्छ भन्नुभएको छ । यसले पनि त्यस्तो आशंकालाई बल पुर्‍याएको छ भन्न सकिँदैन ?

निर्वाचनको तयारीका साथ युद्धको मोर्चामा होमिएको दलको अध्यक्षले तीन लाख काठमाडौं उतारिसकेपछि निश्चितै नयाँ सन्देश दिनु नै हुन्छ । तैपनि हाम्रो प्रधानमन्त्रीले दिनहुँ नयाँ कुरा त दिनुभएकै छ । भोलि थप विशेष कुरा दिनु हुनेछ । त्यो विशेष कुरा भनेको चाहिँ संकीर्णतावादी सोचले सांस्कृतिक राजतन्त्र अथवा के-के भनेर व्याख्या गरेका छन् । त्यस्तो होइन । प्रगतिशील, जनवादी, राष्ट्रवादी र वैज्ञानिक नयाँ कुरा दिनुहुन्छ ।

संसद् विघटनसम्बन्धी मुद्दा सर्वोच्च अदालतमा छ । नेकपाको वैधानिकता विवाद निर्वाचन आयोगमा विचाराधीन छ । यसलाई असर पार्न पनि तपाईहरु शक्ति प्रदर्शन गर्दै हुनुहुन्छ भन्दा गल्ती हुन्छ ?

निर्वाचन आयोगले कानूनी प्रक्रियालाई आत्मसाथ गरेर विषयवस्तु टुंग्याउँछ । सभाकोे उपस्थिति हेरेर त नटुंग्याउला । हामीले पार्टी एकतापछि बनाएको विधानले दुईवटा अध्यक्षको सहमतिमा महासचिवले बैठक बोलाउने र बैठकका एजेण्डाहरु सहमतिमा टुंग्याउने भन्ने छ, एकताको महाधिवेशनसम्म । त्यो विधानको व्याख्या गरेर दुई अध्यक्ष मध्य पनि प्रथम अध्यक्षले आधिकारिकता पाउने संभावना अधिक हुन्छ । महासचिव पनि भएको र सर्वसम्मत ढंगले अर्को पक्षले निर्णय गर्न नसकेको आदि-इत्यादि कारणले गर्दा हामीले वैधानिकता पाउन सभा नै आवश्यक होइन ।

तर, पनि सभामार्फत् विभाजनको प्रभावचाहिँ जनतामा गएको छैन, कार्यकर्ता पंक्तिमा गएको छैन भन्ने देखाउने मनोवैज्ञानिक कुरा पनि हो ।

प्रधानमन्त्रीसँग जनता छन् भन्ने देखाउन यो सभा अन्तिम हुन्छ कि थप सभाहरू आयोजना गर्नुहुन्छ ?

सभा त देशभर गर्छौं । जस्तो- बुटवलमा फागुन १ गते हुँदैछ । खुलेर सभा गर्नु आवश्यक पनि छ । किनभने, तीन वर्षसम्म पार्टी एकताका नाममा कार्यकारी अधिकार बोकेका कमरेड प्रचण्डले यो पार्टीलाई होल्डमा राखेर कुनै कार्यक्रम नराखी, संगठन नबनाई गुटबन्दी गरेर, आफ्नो पदका लागि आश्वासन बाँडेर बस्नुभयो । त्यसले हाम्रो संगठन फोहोर पोखरीजस्तो भएको थियो । अहिले उहाँहरु यो पार्टी छोडेर गएपछि हाम्रो संगठन स्वच्छ नदी बन्ने अवस्था आएको छ । त्यसो हुनाले कार्यक्रमहरु गर्छौं र आवश्यकताअनुसारका सभाहरु भविश्यमा गर्छौं ।

अर्को समूहले काठमाडौंमा तपाईंहरुको भन्दा ठूलो सभा गर्‍यो भने नि ? फेरि तपाइहरुले अर्को सभा राख्नुहुन्छ ?

अहिले तत्काल उहाँहरुसँग होडबाजी त किन गर्नुपर्‍यो र ! त्यस्तो त हामी गर्दैनौं । अलि पछि चुनावलाई फोकस गरेर अलि भव्य सभा गर्न सक्छौं । अब उहाँहरुलाई काउण्टर त हामीले दिनै पर्दैन नि । जस्तो- बुधवारको मोटरसाइकल र्‍याली उहाँहरुले देशभरको सभा जोड्दा पनि हाम्रो ठूलो भयो । भोलि सभा पनि उहाँहरुले देशभरि गरेको सभाभन्दा धेरै ठूलो हुन्छ । साभार : अनलाइनखबर 

भर्खरै प्रकाशित

एमाले सांसदहरुले तत्काल राजीनामा दिनुपर्छ : बाबुराम भट्टराई

सत्ता साझेदार जनता समाजवादी पार्टीका संघीय परिषद अध्यक्ष डा.बाबुराम भट्टराईले नेकपा एमालेका सांसदहरुलाई पदबाट राजीनामा दिन चुनौति दिएका छन् । पूर्वप्रधानमन्त्री समेत रहेका भट्टराईले संसदलाई…

पाइलट एजी शेर्पा : जस्ले ७३ जनालाई नयाँ जीवन दिए

काठमाडौं । एजी शेर्पा अर्थात् ७३ जना यात्रुको जीवन फर्काइदिने भगवान । ‘हामफाल्छौँ, नबाँचिनेरहेछ’ भनेर जीवन माया मारेर चिच्याउँने यात्रुको मुहारमा खुसी ल्याइदिए पाइलट एजी…

भारतको सीमामा ५० हजार चिनियाँ सैनिक, नियन्त्रण रेखामा ठूलो संख्यामा…

काठमाडौं। भारत चीन सीमा क्षेत्र पूर्वी लद्दाखको वास्तविक नियन्त्रण रेखा (एलएसी) मा चीनले ५० हजार सैनिक तैनाथ गरेको छ । यस क्षेत्रमा चिनियाँ सेनाले ठूलो…

परराष्ट्रमन्त्री अमेरिका पुगेपछि भने, ‘एमसीसी संशोधन हुन सक्दैन, जसरी पनि…

काठमाडौं । परराष्ट्रमन्त्री डा. नारायण खड्काले अमेरिकी सहयोग परियोजना (एमसीसी) संशोधन हुन नसक्ने बताएका छन् । संयुक्त राष्ट्रसंघको ७६ औं महासभामा भाग लिन न्युर्योक पुगेका…

विमानका यात्रुको अनुभव : एयर होस्टेसको आँखामा आँसु थियो, हामीले…

११ असोज, काठमाडौं । सोमबार काठमाडौंबाट उडेको वुद्ध एयरको विमान विराटनगर विमानस्थलमा अवतरण हुन नसकेपछि फेरि काठमाडौं फर्कियो । त्रिभुवन विमानस्थलमा पनि सहजै अवतरण हुन…