उपचार गर्न नसक्ने संक्रमितको सरकारले गर्ने भनेकै छ त, भ्रम फैलाउने काम भयो : प्रधानमन्त्री

काठमाडौं । प्रधानमन्त्री केपी शर्मा ओलीले कोरोना संक्रमितले उपचार खर्च आफैं व्यहोर्नुपर्ने निर्णयबारे भ्रम फैलाइएको बताएका छन् ।

सरकारले हालै मात्र आर्थिकरुपमा विपन्न, अशक्त, असहाय, एकल महिला, अति अपाङ्गता भएका नागरिक, जेष्ठ नागरिक र अग्रपंक्तिमा खटिनेहरुमा लक्षण देखिए मात्रै परीक्षण र उपचार गर्ने र यदि कोरोना बिमा गरेको भए त्यसबाट कट्टा गर्ने निर्णय गरेको थियो ।

तोकिएका बाहेक अरु संक्रमितले भने कोरोना परीक्षण र उपचारका लागि शुल्क तिर्नुपर्ने सरकारले निर्णय सुनाएको छ ।

सरकारी निर्णयको चौतर्फी आलोचना भइरहेको छ । स्वयंम सत्तारुढ नेपाल कम्युनिस्ट पार्टी (नेकपा) कै नेताहरुले समेत यो निर्णय सच्याउन सरकारसँग माग गरेका छन् ।

तर, मंगलबार साँझ बसेको मन्त्रिपरिषद् बैठकमा प्राधनमन्त्री ओलीले भने आफैं खर्च गर्न नसक्नेहरुको उपचार सरकारले गर्ने भनेको स्पष्ट पारे ।

तर, सरकारको निर्णयलाई लिएर भ्रम फैलाइएको भन्दै प्रधानमन्त्री ओलीले त्यसलाई चिर्नुपर्ने बताएको एक मन्त्रीले अनलाइनखबरलाई जानकारी दिए ।

हेल्लो सरकार ! यी बिरामी विपन्न कि सम्पन्न ?

काठमाडौं । नेपालगञ्जकी विष्णु थापाले वीर अस्पतालको कार्डियोलोजी विभागमा रहेको आइसोलेसनमा उपचाररत कोरोना संक्रमित श्रीमानको अनुहार पाँच दिनदेखि हेर्न पाएकी छैनन् ।

थापाको दैनिकी पछिल्लो एक सातादेखि भुइँतलामा राखिएको बेञ्चमै बित्ने गरेको छ । साथमा छोरी पनि छिन् । कोरोना संक्रमणपछि अस्पतालमा उपचाररत उनीहरुका अभिभावक मृगौला रोगीसमेत हुन् ।

विष्णु घरि यताउति डुल्न पुग्छिन् त घरि भर्‍याङबाट तल झरिरहेका चिकित्सकले आफ्ना पतिको केही खबर ल्याए कि भनेर जिज्ञासु नजरले हेर्छिन् ।

कोरोना संक्रमित ५९ वर्षीय पति र पिताको शीघ्र स्वास्थ्यलाभको कामना गर्नेबाहेक आमाछोरीसँग अरू केही विकल्प छैन ।

मंगलबार बिहानै वीर अस्पतालका चिकित्सकले विष्णुलाई औषधिको लिष्ट थमाए । सरकारले विपन्नबाहेक अन्य कोरोना संक्रमितको उपचार निःशुल्क नगर्ने घोषणा गरिसकेको छ ।

थापा परिवार विपन्न हो होइन, परिभाषा गर्न गाह्रो छ । उपचारका क्रममा उनीहरुसँग भएको पैसा लगभग सकिएको छ । विष्णु भन्छिन्, ‘कमाउने मान्छे एक सातादेखि अस्पतालमै हुनुहुन्छ । हामीसँग पैसा पनि कहाँबाट आओस् ?’

विष्णुले मलिन स्वरमा थपिन्, ‘केही दिन त औषधिको लिस्ट दिने गरेका थिएनन्, अब सुरु भयो ।’

थापा कोरोना संक्रमित भएपछि उनलाई आवश्यक सबै औषधिको खर्च सरकारले नै व्यहोरेको थियो । श्रीमानको अवस्था के होला भन्ने चिन्ता लागे पनि विष्णुलाई सरकारले गराएको निःशुल्क उपचारले ठूलो राहत महसुस भएको थियो ।

तर, अकस्मात मंगलबार बिहान चिकित्सकले औषधिको लामो लिस्ट थमाए । पैसा तिरेर औषधि किन्न भने । विष्णु भन्छिन्, ‘एक्कासी १० हजारको औषधिचाहिँ हामीलाई किन्न पठाएपछि अचम्म पनि लागेको छ ।’

१७ वर्षअघि नेपालगञ्जबाट काठमाडौं आएका ५९ वर्षीय थापाले केही वर्षको नोकरीपछि काठमाडौंको ग्रिनल्याण्डमा बेकरीका सामान बेच्ने पसल सुरु गरे । त्यतिबेला विष्णु र कुमारका एउटै मात्र सन्तान थिए । सुरुका केही वर्ष त उनीहरूलाई आवश्यक खर्च धान्नै ठीक थियो । बिस्तारै बेकरीमा सामान थपिँदै गयो । अहिले जेनतेन दुई सन्तानसहित आफू पालिएर केही पैसा बचत गर्न सक्ने भएका थिए ।

तर, २०७६ सालको वैशाख महिनामा उनीहरूको परिवार गम्भीर संकटमा गुजि्रन पुग्यो । अनुहारमा चिड्चिडाहट पसिना र शरीरमा उच्च ज्वरो आएपछि अस्पताल भर्ना भएका थापाको स्वास्थ्य परीक्षण भयो र अन्त्यमा रिपोर्ट आयो, दुवै मृगौला फेल ।

थापा छाँगाबाट खसेजस्तै भए । श्रीमती विष्णु आफू शान्त स्वभावको भए पनि हिम्मतिली थिइन् । उनले नै पतिलाई सम्झाएर मनोवैज्ञानिक उपचार दिएकी थिइन् । उनी सम्झन्छिन् ‘यसै त डराउने मान्छे हुनुहुन्थ्यो, दुबै मृगौला फेल भएको रिपोर्टपछि उहाँमा एकाएक बेचैनी बढेर गयो ।’

त्यतिबेला थापालाई आईसीयूमा नै उपचार गरेर राख्नु परेको थियो । जसमा केही जम्मा गरेको पैसा पनि सकियो ।

बीचका केही महिना उनीहरूको परिवार पीडामा नै बित्यो । २०७७ साल असार महिनादेखि थापाले नियमित डायलासिस गराउँदै आएका छन् ।

पछिल्लो केही महिनादेखि काठमाडौंमा कोरोनाको महामारी बढ्दै थियो । दुबै मृगौलाले काम नगरे पनि थापा गुजाराका लागि आफ्नो व्यवसायमा सकि्रय थिए । तर, हरेक समयमा सावधानी भने अपनाउने गरेको विष्णु बताउँछिन् । तर, कहिले के भयो कुन्नि । गत मंगलबारदेखि उनलाई ज्वरो आउने र ज्यान दुख्ने समस्याले सताउन थाल्यो ।

कोरोनाको लक्षण मिलेपछि परिवारले झट्टै शंका गरिहाले । उनलाई रातारात वीर अस्पताल ल्याइयो । राति १० बजे वीर अस्पतालको आपतकालीन कक्षमा उपचार सुरु गरेका उनलाई भोलिपल्टै कोरोना परीक्षण गरेर अस्पताल भर्ना गरियो । शुक्रबार रिपोर्ट आयो, पोजेटिभ ।

शुक्रबारसम्म नियमित देखादेखसम्म भएका श्रीमान् शुक्रबारदेखि आइसोलेसनमा गए । ‘हामी मंगलबारदेखि यहीँ कुर्सी र यही प्राङ्गणमा छौं,’ विष्णु भन्छिन्, ‘शुक्रबारसम्म औषधिको पैसा खोजिनिति गरेर पनि तिरेका थियौं । कोरोना संक्रमित भएपछि औषधिको पैसा तिर्नुपरेको थिएन, तर आजबाट फेरि औषधि आफैंले किन्नू भनेका छन् । पैसा कहाँबाट ल्याउने, थाहा छैन ।’

भोजपुर घर भएका काजी राई पनि असोज २९ गते कोरोना संक्रमित भएर वीर अस्पतालस्थित आइसोलेसनमा छन् । आइसोलेसन सेन्टरको भुइँतलामा उनकी बुहारी लिना भेटिइन् ।

सात वर्षअघि भोजपुरबाट काठमाडौं आएका राई पेन्टिङको काम गर्छन् । ३९ वर्षीय राईको विवाह भएको छैन । उनलाई भाइ र बुहारी कुर्न आउने गर्छन् ।

‘उभिँदाउभिँदै एक्कासी ढल्ने समस्या भएपछि टाउकोको अप्रेसन गर्न आएका थियौं’ लिनाले अनलाइनखबरसँग भनिन् ‘अप्रेसन गरेको तेस्रो दिन कोरोना पोजिटिभ आयो । खल्तीमा पैसा छैन । अब सरकारले पनि हात उठाउने हो भने बिरामीलाई कसरी बचाउने ?’

सरकारले तिर् भने पनि तिर्न सक्ने अवस्था आफूहरूको नभएको लिना बताउँछिन् । उनी भन्छिन् ‘दबाब दिएर पनि के गर्ने हो र ? खर्च ल्याउन सक्ने अवस्था भए पो ल्याउनु । सरकारले भने पनि खर्च गर्न सक्ने अवस्था छैन ।’

अहिले विभिन्न सरकारी अस्पतालको आइसोलेसनमा बसेका बिरामीहरूलाई सरकारी निर्णयसँगै आवश्यक पर्ने औषधि र अन्य खर्च आफैँ व्यहोर्न सरकारी अस्पतालले उर्दी जारी गरिसकेका छन् ।

धनगढी स्थायी घर भई हाल भक्तपुर बस्ने राजेश सिंह आफ्ना भाइ दुर्घटनामा परेपछि उपचार गराउन जाँदा कोरोना संक्रमण पुष्टि भयो । त्रिवि शिक्षण अस्पतालको आइसोलेसन बाहिर भाइको उपचार कुरेर बसेका सिंहले सोमबार बेलुका अस्पतालका सबै कोरोना संक्रमितलाई अब सरकारले संक्रमितको उपचार नगर्ने भएकाले खर्चको जोहो गर्न उर्दी जारी गरिसकेको छ ।

कात्तिक २ गते सरकारको कोरोना संक्रमितको नियमित अपडेटको क्रममा स्वास्थ्य मन्त्रालयका प्रवक्ता जागेश्वर गौतमले अब अग्रपङ्तिमा खटिएका र केही अन्यबाहेक अरूले कोरोनाको उपचार आफैँ गर्नुपर्ने बताएका थिए ।

नेपालको संविधानले प्रत्याभूत गरेको निशुल्क शिक्षा र स्वास्थ्य सम्बन्धी हक एवं सर्वाेच्च अदालतको आदेश विपरीतसमेत हुने गरी सरकारले गरेको निर्णयको सर्वत्र विरोध भइरहेको छ । निम्न आर्थिक अवस्था भएका बिरामीहरू अस्पतालको शय्याबाटै पैसा जुटाउनुपर्ने मानसिक दबावमा पर्न थालेका छन् । तर, सरकारी निर्णयबमोजिम अस्पतालहरूले भने कोरोना भाइरस संक्रमितहरूसँग पैसा माग्न थालिसकेको छ ।

त्रिवि शिक्षण अस्पतालले पनि सरकारी निर्णय अनुसार कोरोना संक्रमितलाई पाँच दिनको उपचार खर्च जम्मा गर्न लगाउने निर्णय भएको बताएको छ ।

त्रिवि शिक्षण अस्पतालका कोभिड संयोजक डाक्टर सन्तकुमार दासले सोमबार अनलाइनखबरसँगको कुराकानीमा अस्पताल प्रशासनको बैठकले ५ दिनको उपचार खर्च जम्मा गर्न लगाउने निर्णय गरेको जानकारी दिएका हुन् ।

सो निर्णयअनुसार सामान्य लक्षण भएकाहरूले हरेक दिन ३५ सय, मध्यम लक्षण भएकाहरूले ७ हजार र आईसीयूमा भर्ना हुनेहरुले प्रतिदिन १५ हजारको दरमा पैसा जम्मा गर्नुपर्ने निर्णय अस्पताल प्रशासनले गरेको उनले बताएका छन् । यो पैसामा खानाको शुल्क जोडिएको हुँदैन ।

भर्खरै प्रकाशित

मन्त्रीहरूको कार्यभार तोकियो, स्वास्थ्य तथा जनसंख्या मन्त्रालयको कार्यभार कृष्णगोपाल श्रेष्ठलाई

काठमाडौँ । राष्ट्रपति विद्यादेवी भण्डारीले प्रधानमन्त्री र मन्त्रीहरूको कारभार तोकेकी छन् । प्रधानमन्त्री केपी शर्मा ओलीको बिहीबारको सिफारिसबमोजिम कार्यभार तोकिएको राष्ट्रपति कार्यालयले जनाएको छ ।…

समर्थकले रोनाल्डोलाई कोकको बोतलले हा’नेपछि….

पोर्चुगलका स्टार क्रिस्टियानो रोनाल्डो निकै फर्ममा देखिएका छन् । उनले जारी युरो कपका समूह चरणका तीनवटै खेलमा गोल गरे । फ्रान्स विरुद्धको खेलमा २ गोल…

चीनको धम्किबाट जव ताइवान नडराई यस्तो भन्यो

ताइवानले चीनसँग हुने यु’द्धको लागि तयार रहनुपर्ने समय आएको बताएको छ। ताइवानको सीमा क्षेत्रमा बढ्दो चिनियाँ सैन्य गतिविधिले यु’द्धको सम्भावना निम्तिएको ताइवानका विदेशमन्त्री जोसेप वुले…

माइतीघरमा शिक्षामन्त्रीको पुत्ला दहन, जातीय विभेदविरुद्ध प्रदर्शन

काठमाडौं । काठमाडौंको माइतीघरमा जातीय विभेदविरुद्ध दलित अधिकारकर्मी र विद्यार्थीहरुले प्रदर्शन गरेका छन् । ‘मान्छे भएर बाँच्ने अधिकार सुनिश्चित गर’ लेखिएको ब्यानरसहित अधिकारकर्मीले प्रदर्शन गरेका…

मन्त्रीहरुको जिम्मेवारी हेरफेर, गृह मन्त्रालयको जिम्मा विष्णु पौडेललाई

१० असार, काठमाडौं । प्रधानमन्त्री केपी शर्मा ओलीले मन्त्रीहरुको जिम्मेवारी हेरफेर गरेका छन् । उनले रक्षा र परराष्ट्र मन्त्रालय आफैंसँग राखेका छन् । त्यस्तै उपप्रधानमन्त्री…